सुगंध मराठीचा

.        *सुगंध मराठीचा*

मराठी भाषेचा सुगंध आगळा
तिच्या संस्कृतीचा खूप मोठा ठेवा।
शब्दाशब्दांतून वाहे गोड सार
ज्ञानविज्ञानाचा सर्वांसाठी मेवा।।

रोज तुकयाची ओवी येते ओठी
ज्ञानेशाचा मनी वसे हरिपाठ।
शब्दांनी स्पर्शतो जनाईचा भाव
सदा सर्वकाळ दाखविते वाट।।

आईच्या तोंडची तीच असे बोली
बालपणीच्या आठवणींची खाण।
शिवबांची तलवार धार मऱ्हाटीची
किती किती गावे मराठीचे गान।।

शब्द तिचे जणू मोतीयांची माळ
मराठी मातीची सृजनशीलता।
एकांकिका, कथा, कविता, नाटक
गद्य पद्यांमध्ये असे प्रगल्भता।।

माय मराठी गे तुझा अभिमान,
तूच स्वत्व माझे आणि आत्मभान।
सांभाळीन तुला जपून उराशी
वाढवीन तेज करुनी सन्मान।।

          *चंद्रकांत निकाडे*
    पोहाळे, पन्हाळा, कोल्हापूर
             9922314564