*महा(भाग)कवी*

.       *महा(भाग)कवी/कवयित्री*

काही महा(भाग)कवी/कवयित्री
एखाद्याची कविता चोरून

तिच्या आई-बापाचे श्राद्ध घालून
खाली स्वत:चे नाव लिहून
फिरवतात दारोदारी/घरोघरी/चेहरेपुस्तक/कायाप्पावरती
बेवारस अवस्थेत
... ... ...
तरीही ठीक.
... ... ...
पण
कधीतरी अशी
नाव खोडलेली कविता
फिरत फिरत येते
आई-बापाकडेच अजाणतेपणे
तेव्हा खूप वाईट वाटतं
क्षणभर

मात्र लगेचच
'आपली कविता लोकांना आवडते
इतकं तरी समाधान'
या विचाराने मन हुरळून जाते

हो!
पण मला एक प्रश्न पडतो
तिला आई-बाप भेटल्याचा आनंद
होत असेल का ?

.               *रमेश कुरलीकर.*